Kampioni i Kosovës në hendboll për femra, Istogu, e ka mësuar kundërshtarin për raundin e tretë të Kupës Evropiane (EHF European Cup).

Pas shortit të hedhur të martën, Istogu do të përballet me skuadrën e njohur portugeze Madeira Andebol SAD.

Ndeshja e parë do të zhvillohet në Portugali më 8 apo 9 nëntor, ndërsa ajo e kthimit në Kosovë më 15 apo 16 nëntor.

Madeira është njëra prej skuadrave më me përvojë në garat evropiane, ndërsa garimin e nis pikërisht nga ky raund.

Istogu ka kaluar për herë të pestë në histori një kundërshtar evropian, pasi në raundin e dytë eliminoi ekipin grek AEP Panorama, me të dyja ndeshjet e zhvilluara në Banjë.

Tri skuadrat e tjera kosovare – Samadrexha, Ferizaj dhe Shqiponja – janë eliminuar nga gara.

Pavarësisht sfidës së vështirë që e pret, Istogu synon ta vazhdojë serinë e sukseseve në arenën evropiane./rtk